Sunnudagur 5. september 2010
Spurningar og svör
Hér er að finna allar spurningar og svör sem birtast hér á vefnum varðandi
þjónustu Intrum og þá möguleika sem bjóðast í innheimtumálum.
- Af hverju dregur Intrum ekki frá fjármagnstekjuskattinn?
- Intrum fékk undanþágu frá því að draga fjármagnstekjuskatt af vöxtum. Ástæðan er sú að viðskiptavinir Intrum eru að mestu leyti fyrirtæki en ekki einstaklingar. Vaxtatekjur greiðast að fullu til kröfuhafa í uppgjörum Intrum og því ekki um að ræða neinn fjármagnstekjuskatt.
- Af hverju er ég rukkaður um virðisaukaskatt af innheimtukostnaði?
- Í þeim tilvikum sem viðskiptavinur er VSK-skyldur ber honum að greiða VSK af innheimtuþóknun sem lögð er á greiðanda. Í uppgjöri er VSK skuldfærður á viðskiptavininn og Intrum gerir hann upp við Ríkissjóð. Viðskiptavinur nýtir sér svo þennan VSK sem innskatt í rekstri.
- Af hverju er skuldajafnað?
- Þetta er hagræðingasjónarmið og er regla t.d. í lögfræðiinnheimtu. Hluti af því sem er skuldajafnað er hreinn VSK sem Intrum skilar til ríkissjóðs og ekki er talið réttlætanlegt að lána hann.
- Af hverju greiði ég fyrir áskrift að milliinnheimtu Intrum?
- Þú ert í raun að kaupa þér ákveðið þjónustustig en með áskrift færðu:
- Heimild til þess að nota nafn Intrum á einni ítrekun í fruminnheimtu (Intrum stimpill)
- Aðgang að viðskiptavef Intrum og Lögheimtunnar
- Viðskiptastjóra sem ber ábyrgð á samskiptum við fyrirtæki.
- Aðgang að Innheimtuskóla Intrum (fyrstu tvö námskeiðin fyrir tvo að kostnaðarlausu)
- Milliinnheimtu, innheimtu á innlendum vanskilakröfum.
- Faglegt mat og ráðgjöf um næstu skref beri fyrsta lögfræðibréf ekki árangur
- Lögfræðiinnheimtu, innheimtuaðgerðir á lögfræðistigi (sjá nánar samningsskilmála)
- Kröfuvakt, innheimtu á afskrifuðum kröfum
- Millilandainnheimtu, innheimta á erlendum vanskilakröfum
- VAT Refund, innheimta á greiddum virðisaukaskatti af keyptri þjónustu erlendis
Auk þessa færðu með áskrift réttinn til að vísa í samstarf við Intrum í ítrekunum sem eitt og sér hefur borið mjög góða raun.
- Af hverju kemur ekki reikningur fyrir IK kostnaði?
- Þar sem IK kostnað ber að greiða af greiðanda og ætti ekki að vera greiddur af kröfuhafa þá er ekki gefinn út reikningur fyrir honum. Í þeim tilvikum sem greiðandi gerir upp kröfu beint til kröfuhafa færist IK kostnaðurinn á kröfuhafann og til verður skuld hjá Intrum. Það er undir kröfuhafa komið hvort hann taki hann á sig eða ekki og fer það eftir því hvernig kostnaðurinn er bókaður. Hægt er að prenta út fylgiskjal ef farið er í hreyfingar í uppgjörum á viðskiptavefnum.
- Ef greiðandi vill greiða beint til kröfuhafa en ekki til Intrum, hvað geri ég þá?
- Ef greiðandi er t.d. hjá kröfuhafa til að gera upp skuld við hann er best að kröfuhafi fari inn á málið á viðskiptavefnum og sjáí þar stöðuna á málinu. Þá rukkar hann um allt sitt og einnig IK kostnaðinn sem kröfuhafi fær greitt til sín og færir IK kostnaðinn til skuldar á Intrum. Sú skuld verður dreginn frá næsta uppgjöri frá Intrum til kröfuhafa.
- Ég er með lögfræðing sem sér um öll mín mál, þarf ég að færa mig alfarið til ykkar/Lögheimtunnar?
- Þú þarft ekki að breyta samstarfinu við lögfræðinginn þinn. Intrum getur séð um milliinnheimtuna fyrir þig og ef innheimtuaðgerðirnar reynast árangurlausar þá getum við sent málin til lögfræðingsins sem þú skiptir við.
- Get ég bókað án þess að hafa reikning?
- Ekki má, samkvæmt lögum, færa kostnað nema hafa frumrit reiknings.
- Get ég frestað fyrirtöku máls sem er í nauðungarsölu?
- Ekki er hægt að fresta fyrstu fyrirtöku, hægt er að fresta byrjun uppboðs og ekki er hægt að fresta framhaldssölu/lokasölu.
- Getur greiðandi fengið frest á dómtöku máls?
- Greiðandi getur mætt við þingfestingu máls og óskað eftir fresti og er hann almennt veittur í þeim tilfellum.
- Getur greiðandi haft áhrif á framgang máls þegar komið er í lögfræðiinnheimtu?
- Greiðandi getur á hvaða stigi lögfræðiinnheimtu sem er greitt kröfu og þannig haft áhrif á framgang hennar. Greiðandi getur líka mætt við þingfestingu máls og óskað eftir fresti og er hann almennt veittur í þeim tilfellum. Greiðandi getur með því að mæta ekki í fjárnám frestað niðurstöðu þess. Ef ekki eru til eignir þá er ekki hægt að ljúka með árangurslausu fjárnámi nema greiðandi mæti.
- Getur greiðandi sjálfur látið taka sig af Vanskilaskrá?
- Greiðandi getur ekki látið taka sig af Vanskilaskrá nema hann greiði kröfuna sem um ræðir.
- Hvað er lögfræðileg innheimta?
- Lögfræðileg innheimta er það stig sem kemur eftir að aðrar innheimtutilraunir hafa verið reyndar án árangurs. Á þessu stigi er úrræðum lögfræðinnar, einkum kröfuréttar og réttarfars, beitt með aðstoð opinbers valds, þ.e. dómstóla og sýslumanna.
- Hvað er Vanskilaskrá?
- Eins konar “svartur listi” yfir þá sem ekki hafa staðið í skilum
- Upplýsingar um vanskil síðustu fjögurra ára
- Upplýsingar um stöðu vanskilamála
- Dagleg uppfærsla gagnagrunns
- Hvað gerist ef greiðandi mætir ekki í fjárnám?
- Ef vitað er um eign í eigu greiðanda er gert í henni fjárnám. Ef ekki er vitað um eign er greiðandi boðaður á ný í fjárnám. Ef greiðandi mætir ekki aftur þá er send ítrekun og ef greiðandi mætir enn ekki er send lögregluboðum sem þýðir að greiðandi verði sóttur af lögreglu og hann færður í fjárnámið. Greiðandi getur því frestað aðgerðum með því að mæta ekki í fjárnám þótt að sjálfsögðu sé ætlast til þess að greiðandi mæti.
- Hvað gerist ef greiðandi stendur ekki við réttarsátt?
- Ef greiðandi stendur ekki við réttarsátt er hún skráð á Vanskilaskrá. Réttarsáttin er svo send í aðför til Sýslumanns og fer í gegnum það ferli eins og árituð stefna eða dómur.
- Hvað hefur þjónusta Intrum fram yfir þjónustu annarra innheimtufyrirtækja?
- Það er fyrst og fremst áralöng reynsla og þekking sem byggir á sterkum tengslum við móðurfyrirtækið Intrum Justitia sem er eitt stærsta milliinnheimtufyrirtækið í Evrópu. Lykilatriði að baki þjónustunnar er áherslan á að viðhalda viðskiptasamböndum kröfuhafa og skuldara þrátt fyrir vanskil sem oft eru tímabundin. Því leggjum við mikla áherslu á hófsamar eða "mjúkar" innheimtuaðferðir sem eru hugsaðar til að breyta hegðun skuldara og fá þá til að greiða fyrr en ella frekar en að fara í harðar innheimtuaðgerðir. Við meðhöndlum skuldara ávallt af virðingu og kurteisi. Intrum var fyrst til að kynna þessa þjónustu hér á landi og býr fyrir vikið yfir mikilli reynslu og þekkingu á innheimtumálum.
Ennfremur býðurInkasso hugbúnaðurinn sem heldur utan hverja kröfu upp á einstaka möguleika í eftirfylgni og öryggi við meðhöndlun krafna. Hugbúnaðurinn hefur verið þróaður af Intrum Justitia á löngum tíma og aðlagaður að íslenskum aðstæðum og á fáa sína líka.
Starfsfólk Intrum hefur ennfremur mikla reynslu af meðhöndlun vanskilakrafna og samskipta við skuldara. Í starfsmannahópnum er valinn maður í hverju rúmi þar sem mikið er lagt upp úr góðri menntun og færni í mannlegum samskiptum.
Auk þessa má svo ekki gleyma sérstöðu okkar í Millilandainnheimtu, en við erum aðili að stærsta innheimtuneti í heimi og getum sinnt innheimtum í nánast hvaða landi sem er.
- Hvað kemur fram í innheimtubréfi?
- Innheimtubréf er í raun tilkynning um að krafa sé komin í lögfræðilega innheimtu. Í því felst áskorun til greiðanda um að inna af hendi greiðslu eða semja um skuld innan tiltekins frests. Greiðanda er þar einnig gerð grein fyrir því að krafan verði innheimt með aðför eða fyrir atbeina dómstóla sé hún ekki greidd eða um hana samið. Einnig er tiltekinn sá kostnaður sem fallinn er á kröfuna.
- Hvað líður langur tími eftir að greiðanda er stefnt af stefnuvotti þar til hann skal mæta fyrir dóm?
- Ef stefndi á skráð lögheimili, fasta búsetu eða dvalarstað í þeirri þinghá sem mál verður þingfest er stefnufrestur þrír dagar, þ.e. stefna þarf að hafa borist greiðanda (stefnda) í hendur þremur dögum fyrir áætlaðan þingfestingardag af stefnuvotti eða póstmanni. Ef stefndi á skráð lögheimili, fasta búsetu eða dvalarstað á Íslandi en utan þinghár þar sem mál verður þingfest er stefnufrestur ein vika. Ef stefndi á heimili eða dvalarstað erlendis eða heimilisfang hans er óþekkt er stefnufresturinn einn mánuður.
- Hvað tekur fjárnám langan tíma?
- Það fer mjög mikið eftir því hversu mikið álag er á starfsmönnum viðkomandi Sýslumannsembættis.
- Hvað tekur langan tíma fyrir dómara að gefa út niðurstöðu í dómsmáli?
- Það er mjög misjafnt og fer nokkuð eftir umfangi máls, álagi á dómara og aðstoðarmenn og því hvort tekið sé til varna í málinu. Það er nánast ómögulegt að setja nákvæma tímasetningu á það og er allt frá fjórum vikum eðlilegt.
- Hvað þýðir framhaldsuppboð?
- Framhaldsuppboð fer fram á eigninni sem selja á og er ekki hægt að fresta því. Aðgerðin er auglýst í dagblöðum. Kröfulýsing í söluandvirði er lögð fram og er eignin seld hæstbjóðanda.
- Hvað þýðir fyrsta fyrirtaka?
- Fyrsta fyrirtaka fer fram á skrifstofu sýslumanns og henni er ekki hægt að fresta. Fyrsta fyrirtaka er auglýst í Lögbirtingarblaðinu. Í fyrstu fyrirtöku er málið í rauninni skráð í nauðungarsöluferlið hjá sýslumanni.
- Hvaða lög gilda um dráttarvaxtareikning?
- Fyrsta reglan er sú að seljandi og kaupandi gera með sér samkomulag um greiðslufrest að öðrum kosti á að greiða reikninginn eins fljótt og mögulegt er. Báðir aðilar þurfa þó að túlka greiðslufrestinn á sama hátt. Þetta er hægt að setja á reikning sem “Greiðist í síðasta lagi DD-MM-ÁÁ” eða tilgreina ákveðinn gjalddaga og ákveðinn eindaga. Kaupandi sem greiðir fyrir eindaga telst í skilum en greiði kaupandi síðar en eindaga, þá á seljandi rétt á dráttarvöxtum frá gjalddaga.
- Hvaða reglur gilda varðandi greiðslufresti, verður maður að veita 30 daga greiðslufrest?
- Höfuðreglan við greiðslufresti er sú að kaupandi og seljandi ákveða hvaða greiðslufrestur á að gilda. Í þeim tilvikum þar sem ekki er um neitt samkomulag að ræða þá skal kaupandi, greiða skv. beiðni frá seljanda. Samkomulög um greiðslufresti verða t.d. til á pantanastaðfestingum, í almennum skilgreindum greiðsluskilmálum, í bæklingum osfrv. Þess ber þó að gæta að í þeim tilvikum þar sem seljandi gefur einhliða upp greiðslufrest á reikningi, þá er ekki um samkomulag að ræða.
- Hvar get ég fengið nánari upplýsingar um uppgjörin ykkar?
- Í boði eru námskeið hjá Innheimtuskólanum þar sem farið er ítarlegar í uppgjör okkar. Vinsamlega hafið samband við okkur á innheimtuskolinn@intrum.is.
- Hve langur er afskriftatíminn á hefðbundnum reikningum?
- Á Íslandi er almennur afskriftatími 4 ár frá útgáfudegi reiknings. Kröfur skv. skuldabréfum, dómi eða opinberri sátt fyrnast þó á 10 árum. Hafa ber í huga að ef kröfuhafi heldur ekki fram kröfu sinni með málssókn eða skuldari viðurkennir ekki kröfuna innan tiltekins frests, telst krafan fallin niður, þ.e. fyrnd.
Fyrningarfrestur byrjar að líða frá gjalddaga kröfu. Slit fyrningarfrests eru við viðurkenningu skuldara á kröfunni eða við málssókn kröfuhafa og þá byrjar nýr fyrningarfrestur að líða.
- Hvenær er hægt að gera eignakönnun?
- Við erum bundin lögum þegar kemur að gerð eignakannana. Slíka athugun má ekki gera nema það liggi fyrir aðfararhæf krafa og athugunina má eingöngu gera af lögmanni.
- Hvenær er krafa skráð á vanskilaskrá?
- Krafa er skráð á Vanskilaskrá um leið og komin er árituð stefna eða dómur. Einnig eru skráðar á Vanskilaskrá kröfur þar sem gert hefur verið samkomulag sem ekki hefur verið staðið við bæði í milliinnheimtu og réttarsáttir. Birt greiðsluáskorun er einnig heimilt að skrá á Vanskilaskrá.
- Hvenær er send út skráning á Vanskilaskrá?
- Skráning í vanskilaskrá LT fer fram ef skilyrði fyrir skráningu eru uppfyllt. Til að skrá vanskil í vanskilaskrá þarf að liggja fyrir með sannanlegum hætti að skuldari sé í vanskilum. Tegundir skráðra upplýsinga eru; auglýst uppboð, byrjun og framhald, áritaðar stefnur og dómar, árangurslaus fjárnám, gjaldþrotaúrskurðir, innkallanir, skiptalok og vanskilagögn (réttarsáttir, greiðsluáskoranir með birtingarvottorðum, skuldabréf o.þ.h.). Sé undirskrift skuldara fyrir hendi skráir Intrum skuldara í vanskilaskrá sé þess óskað. Annarra gagna aflar LT frá sýslumannsembættum og héraðsdómstólum og einnig eru gögn unnin upp úr Lögbirtingarblaðinu.
- Hvenær get ég óskað eftir því að aðili sé lýstur gjaldþrota?
- Hægt er að óska eftir gjaldþroti aðila sé til staðar aðfararhæf krafa og átt hefur sér stað árangurslaust fjárnám. Ekki er nauðsynlegt að árangurslausa fjárnámið hafi verið vegna sömu kröfu og krafist er gjaldþrots vegna. Gjaldþrotabeiðnina þarf að senda í Héraðsdóm og þarf hún að vera móttekin innan við þrem mánuðum eftir að árangurslausa fjárnámið er gert, þ.e. móttökustimpill þarf að vera dagsettur innan við þremur mánuðum eftir að árangurslaust fjárnám er gert.
- Hvenær má ég afskrifa kröfu?
- Grundvöllur afskriftar kröfu er gjaldþrot, árangurslaust fjárnám, andlát og fyrning. Ef um er að ræða mjög lágar kröfur er nóg að sýnt hafi verið fram á að tilraun hafi verið gerð til að innheimta án árangurs.
- Hvernig á að bóka IK kostnað?
- Rétt er að bóka IK kostnað á viðskiptavininn (nema kröfuhafi vilji taka þennan kostnað á sig). Þá prentar hann út fylgiskjal (sjá hér fyrir ofan) en ath að þetta er ekki kostnaður með virðisauka og verður því að bóka á virðisaukaskattslausan gjaldalykil. Þegar greiðsla berst beint til kröfuhafa þarf kröfuhafi að fara inn á málið og tilkynna að greitt hafi verið til hans og tilgreina upphæð. Ekki bóka greiðsluna fyrr en búið er að færa greiðsluna inn á málið því þar sér kröfuhafi hvernig hún ráðstafast, t.d. IK kostn, vextir og höfuðstóll.
- Hvernig á að bóka reikninga vegna þóknunar og virðisaukaskatts ef þeir koma ekki strax?
- Færist debet á biðreikning sem er efnahagslykill. Þegar reikningur kemur færist reikningurinn kredit á biðreikninginn sem fer á núll og debet á gjaldalykil. Sama á við um virðisaukann, fer fyrst á biðreikning og þegar virðisaukaskattsreikningurinn kemur færist hann kredit á biðreikninginn og debet á handfærðan innskatt (efnahagslykill).
- Hvernig á ég að bregðast við andmælum vegna reikninga?
- Svarið ræðst af því um hversu háa upphæð er deilt, hvort deilan snýst um persónur eða hluti, í hvaða ásigkomulagi varan/þjónustan er afhend osfrv. Góð venja er að svara andmælum á skynsaman hátt og rannsaka á hverju þau eru byggð. Auk þess skal gæta þess að hæfir einstaklingar sjái um að meta andmælin og svara þeim.
- Hvernig á ég að finna út hver er að greiða hvað?
- Þegar greiðsla berst frá Intrum fer kröfuhafi inn á viðskiptavefinn, velur greiðsluyfirlit og sundurliðun og þar er að finna allar upplýsingar sem þörf er á.
- Hvernig bóka ég fjármagnstekjuskattinn?
- Ríkissjóður leggur ekki fjármagnstekjuskatt á fyrirtæki. Þrátt fyrir það er bönkum skylt að draga frá fjármagnstekjuskatt af öllum vaxtatekjum og gera upp við Ríkissjóð. Fjármagnstekjuskattur, þar sem hann er dreginn frá, færist á eignalykil í efnahag sem heitir “fjármagnstekjuskattur”. Stöðuna á þessum lykli færir endurskoðandi á framtal félagsins í uppgjöri ársins, sem síðan er dregin frá skattskuld við álagningu, eða verður endurgreiddur sé félag ekki í skuld við álagningu. Intrum er undanþegið frádrætti á fjármagnstekjuskatti og þess vegna er ekki um neinn slíkan að ræða í uppgjörum frá Intrum.
- Hvernig er kröfum komið í Millilandainnheimtu?
- Kröfueigendur þurfa að senda Intrum á Íslandi afrit af reikningum og þá sér fulltrúi í Millilandainnheimtu um afgreiðslu málsins fyrir hönd kröfueiganda. Intrum kemur kröfunum þínum í innheimtu í viðkomandi landi og hefur samband um leið og greiðandi bregst við innheimtunni.
Reglulega eru sendar upplýsingar um stöðu mála. Intrum getur einnig annast flutning krafna yfir í lögfræðilega innheimtu ef með þarf.
- Hvernig get ég fundið út hvað hver er að greiða mér mikið?
- Í greiðsluskránni sem er á Viðskiptavefnum er sundurliðun á því hverjir eru að greiða kröfur sem standa á bakvið hvert uppgjör fyrir sig.
- Hvers vegna Vanskilaupplýsingar?
- Draga úr þeirri áhættu sem fylgir lánaviðskiptum
- Vanskilasaga eykur líkur á vanskilum síðar.
- Gagnlegar upplýsingar eru grundvöllur réttra ákvarðana.
- Að vera án réttra upplýsinga getur verið kostnaðarsamt
- Hversu mikil er starfsemi dóma yfir sumartímann?
- Starfsemi dóma er mismunandi yfir sumartímann. Hjá Héraðsdómi Reykjavíkur er t.d. gert réttarhlé frá júní og fram í ágúst og yfir þann tíma eru engin ný mál dómtekin.
- Hvert er markmiðið með milliinnheimtu, er ekki betra að setja kröfu beint í lögfræðiinnheimtu?
- Innheimtuaðgerðir í milliinnheimtu hjá okkur miða að því að ná hámarks árangri við innheimtuna, en án þess þó að skaða ímynd kröfuhafa. Þarna er grundvallarmunur á hugsunarhætti miðað við innheimtu lögmanna þar sem markmið er einungis að fá kröfuna greidda.
- Í hverju er hægt að gera fjárnám?
- Hægt er að gera fjárnám í fasteignum, ökutækjum, tækjum og lager og öðrum verðmætum sem talin eru standa undir skuldinni. Vissar eignir eru undanþegnar fjárnámi og eru þær skilgreindar í lögum sem lausafjármunir sem nauðsynlegir eru til að halda látlaust heimili, munir sem hafa minjagildi (ef verðmæti þeirra er ekki slíkt að talið sé ósanngjarnt gagnvart þeim sem gerir fjárnámið), munir sem eru nauðsynlegir vegna heilsubrests eða örorku, námsgögn sem eru nauðsynleg vegna skólagöngu og munir sem nýttir eru til atvinnu að samanlögðu verðmæti allt að 50.000 kr.
- Reiknast árangurstengd þóknunin af höfuðstól með eða án vsk.
- Árangurstengd þóknun reiknast af höfuðstól með virðisaukaskatti og áföllnum kostnaði svo sem dráttarvöxtum ofl.
- Þarf alltaf að fara með kröfu fyrir dóm fyrst áður en hægt er að fara í fjárnám?
- Nei, ekki þarf að fara með allar kröfur fyrir dóm áður en þær eru sendar í fjárnám. Skuldabréf sem skýrlega kveða á um aðför án undangengins dóms eða sáttar eru t.d. aðfararhæf án fyrirtöku fyrir dómi. Víxlar og tékkar eru einnig undanþegnir dómsúrskurði ásamt sáttum og nauðasamningum. Ef aðfararheimildin er ekki árituð stefna, dómur eða dómsátt verður að birta sérstaka greiðsluáskorun fyrir greiðanda áður en hægt er að krefjast aðfarar.
- Þarf greiðandi að mæta fyrir dóm?
- Greiðanda er stefnt fyrir dóm með birtingu stefnu. Honum er það í raun í sjálfsvald sett hvort hann mætir eða ekki. Ef greiðandi mætir og fer fram á frest til að taka til varna þá er honum almennt veittur hann. Ef greiðandi mætir ekki þá er stefnan árituð af dómara. Það er því ekki nauðsynlegt fyrir framgang málsins að greiðandi mæti fyrir héraðsdóm.
- Þegar ég fæ ekki greidda reikninga, þarf ég þá að senda út áminningu áður en krafan fer í milliinnheimtu?
- Já skv. Innheimtulögum (nr.95/2008) sem tóku gildi 1. janúar 2009 er kröfuhafa eða innheimtuaðila skylt að senda greiðanda Innheimtuviðvörun þe. skriflega viðvörun þess efnis að vænta megi frekari innheimtuaðgerða verði krafa eigi greidd innan tíu daga frá sendingu viðvörunar. Veita má lengri frest til greiðslu.
Í viðvörun komi fram:
a.
nöfn, kennitölur og heimilisföng skuldara, kröfuhafa eða umboðsmanns hans og innheimtuaðila;
b.
lýsing á kröfu;
c.
fjárhæð kröfu og skal sundurliða hver sé höfuðstóll og hverjar séu viðbótarkröfur, svo sem dráttarvextir og innheimtuþóknun;
d.
greiðslustaður; og
e.
að greiðslufall skuldara geti leitt til málshöfðunar eða annarra innheimtuaðgerða á grundvelli réttarfarslaga og aukins kostnaðar fyrir skuldara.
- © Intrum á Íslandi
- Sími: 440 7000
- Þjónustuver greiðenda: 440 7700
- Fyrirtækjaþjónusta: 440 7777
- Afgreiðslutími 9-16
